89–ാമത് ശിവഗിരി തീർഥാടനം മുഖ്യമന്ത്രി പിണറായി വിജയൻ ഉദ്ഘാടനം ചെയ്തു

വർക്കല: 89–ാമത് ശിവഗിരി തീർഥാടനം മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. മൂന്നു ദിവസമായി നടക്കുന്ന തീർഥാടനത്തിൽ വിവിധ വിഷയങ്ങളിൽ സമ്മേളനങ്ങള്‍ നടക്കും. ശ്രീനാരായണ ഗുരു സ്ഥാപിച്ച ബ്രഹ്മവിദ്യാലയ കനക ജൂബിലിയോട്‌ അനുബന്ധിച്ച്‌ പ്രത്യേക സമ്മേളനവും നടക്കും.

വെള്ളിയാഴ്ച പുലർച്ചെ അഞ്ചിന് തീർഥാടക ഘോഷയാത്ര ആരംഭിക്കും. ഒമിക്രോൺ വ്യാപന ഭീഷണി നിലനിൽക്കുന്ന സാഹചര്യത്തിൽ ആരോഗ്യവകുപ്പിന്റെ നേതൃത്വത്തിൽ കർശന സുരക്ഷാ മാനദണ്ഡങ്ങൾ ഏർപ്പെടുത്തിയാകും തീർഥാടനം നടക്കുക. തീർഥാടകർക്ക് പരിശോധനയിൽ കോവിഡ് പോസിറ്റീവായാൽ ക്വാറന്റീൻ അടക്കമുള്ള സൗകര്യങ്ങൾ ആരോഗ്യവകുപ്പ് ഒരുക്കിയിട്ടുണ്ട്. കനത്ത പൊലീസ് സുരക്ഷാ വലയത്തിലും പ്രധാന നിരത്തുകൾ ഉൾപ്പെടെ നിരീക്ഷണ ക്യാമറകൾ സ്ഥാപിച്ചിട്ടുണ്ട്. ക്രമസമാധാന പാലനത്തിനും ട്രാഫിക് നിയന്ത്രണത്തിനുമായി 600 ലധികം പൊലീസുകാരെ നിയോഗിച്ചിട്ടുണ്ട്.