വാഹനങ്ങളിലെ തെരെഞ്ഞെടുപ്പ് ‌പരസ്യ പ്രചരണം; പരാതിയുമായി കെഎസ് യു

നെടുമങ്ങാട്:  ‌വാഹനങ്ങളിൽ തെരെഞ്ഞെടുപ്പ് പരസ്യങ്ങൾ പതിക്കുന്നതിൽ പ്രതിഷേധവുമായി കെഎസ് യു. നെടുമങ്ങാടും പരിസരപ്രദേശങ്ങളിലും സവാരി നടത്തുന്ന ഓട്ടോറിക്ഷകളിൽ നിയമവിരുദ്ധമായി ആൾട്ടർചെയ്ത് എൽഡിഎഫിന്റെ പരസ്യങ്ങൾ പതിക്കുന്നത് തടയണമെന്നാവശ്യപ്പെട്ട് നെടുമങ്ങാട് സബ് ആർടിഒയിൽ കെ എസ് യു പരാതി നൽകി. മോട്ടോർ വാഹനനിയമങ്ങളും തിരഞ്ഞെടുപ്പ് ചട്ടങ്ങളും ലംഘിച്ചുകൊണ്ടാണ് വാഹനങ്ങളിൽ എൽഡിഎഫ് പ്രചരണം നടത്തുന്നതെന്ന് കെ എസ് യു ആരോപിച്ചു.

പ്രചരണ വാഹനങ്ങളായി ഓട്ടോറിക്ഷകളെ ഉപയോഗിക്കുന്നത് തടയണമെന്ന ആവശ്യപ്പെട്ടുകൊണ്ടാണ് കെ എസ് യു നെടുമങ്ങാട് മണ്ഡലം കമ്മിറ്റിയുടെ നേതൃത്വത്തിൽ നെടുമങ്ങാട് ജോയിന്റ് ആർടിഒയ്ക്ക് പരാതി നൽകിയത്. ചെറിയ പരീക്ഷക്കാരങ്ങൾ നടത്തിയാൽപോലും വാഹന ഉടമകൾക്കു വൻ തുകകൾ പിഴ നൽകുന്ന മോട്ടോർ വാഹന വകുപ്പ് ഈകാര്യത്തിൽ ഇരട്ടത്തപാണ് കാണിക്കുന്നത് എന്ന് നേതാക്കൾ കുറ്റപ്പെടുത്തി. പരാതി അന്വേഷിച്ച് വേണ്ട നടപടികൾ സ്വീകരിക്കുമെന്ന് ജോയിന്റ് ആർ ടി ഒ അറിയിച്ചു.

കെ എസ് യു മണ്ഡലം പ്രസിഡന്റ്‌ അഭിജിത് മഞ്ച, ബ്ലോക്ക്‌ ജനറൽ സെക്രട്ടറി ഉണ്ണിക്കുട്ടൻ നായർ എസ്. ഡി, മണ്ഡലം വൈസ് പ്രസിഡന്റ്‌ അരുൺ ശങ്കർ എസ്, മണ്ഡലം ജനറൽ സെക്രട്ടറി രാഹുൽ അനീഷ് എന്നിവർ പങ്കെടുത്തു.