വിതുരയിൽ അമിതവേഗതയിലെത്തിയ കാറിടിച്ച് കാൽനടയാത്രക്കാരന് ദാരുണാന്ത്യം; വാഹനം തിരിച്ചറിഞ്ഞു

വിതുര: അമിതവേഗതയിലെത്തിയ കാറിടിച്ച് കാൽനടയാത്രക്കാരൻ ദാരുണമായി കൊല്ലപ്പെട്ടു. റോഡിന്റെ ഇടതുവശം ചേർന്നു നടന്നുപോവുകയായിരുന്ന വേണു നായിഡുവാണ് അപകടത്തിൽ മരിച്ചത്. കാർ ഇടിച്ച് തെറിപ്പിച്ച ശേഷം നിർത്താതെ പോവുകയായിരുന്നു. സംഭവത്തിന്റെ സിസിടിവി ദൃശ്യങ്ങൾ പൊലീസിന് ലഭിച്ചിട്ടുണ്ട്.

അപകടത്തിൽ മരിച്ച വേണു നായിഡു

വിതുര പൊലീസാണ് വാഹനം തിരിച്ചറിഞ്ഞത്. ചുവന്ന നിറത്തിലുള്ള സ്വിഫ്റ്റ് കാറാണ് അപകടമുണ്ടാക്കിയത്. ശബരിമല ദർശനം കഴിഞ്ഞ് മടങ്ങിയ മൂന്ന് യുവാക്കളാണ് കാറിലുണ്ടായിരുന്നതെന്നാണ് പൊലീസിന് ലഭിച്ചിരിക്കുന്ന പ്രാഥമിക വിവരം. ഇവരെ ഉടൻ കസ്റ്റഡിയിലെടുക്കുമെന്ന് പൊലീസ് അറിയിച്ചു.

ഇടിയുടെ ആഘാതത്തിൽ റോഡിലേക്ക് തെറിച്ചുവീണ വേണുവിനെ പിന്നാലെയെത്തിയ യാത്രക്കാരാണ് ആശുപത്രിയിലെത്തിച്ചത്. എന്നാൽ ജീവൻ രക്ഷിക്കാനായില്ല. മൃതദേഹം വിതുര താലൂക്ക് ആശുപത്രി മോർച്ചറിയിലേക്ക് മാറ്റി.

പതിവായി അപകടങ്ങൾ നടക്കുന്ന പ്രദേശമാണിതെന്ന് നാട്ടുകാർ വ്യക്തമാക്കി. ഇവിടെ അപകട മുന്നറിയിപ്പായി എട്ടോളം ബോർഡുകൾ പൊലീസ് ഇടപെട്ട് സ്ഥാപിച്ചിട്ടുണ്ടെങ്കിലും അശ്രദ്ധമായ ഡ്രൈവിംഗ് വലിയ ദുരന്തത്തിന് കാരണമാവുകയായിരുന്നു.

വാർത്തകൾ വാട്സ്ആപ്പിൽ ലഭിക്കുവാൻ ക്ലിക്ക് ചെയ്യൂ