നെടുമങ്ങാട്ടെ പ്രമുഖ ഹോട്ടലുകളിൽ നിന്ന് പഴകിയ ഭക്ഷണസാധനങ്ങൾ പിടിച്ചെടുത്തു

നെടുമങ്ങാട്: നെടുമങ്ങാട് ടൗണിലെ പ്രമുഖ ഹോട്ടലുകളിൽ നടത്തിയ പരിശോധനയിൽ പഴകിയ ഭക്ഷണസാധനങ്ങൾ പിടിച്ചെടുത്തു. ഭക്ഷ്യസുരക്ഷാ വിഭാഗത്തിന്റെ നേതൃത്വത്തിൽ നടത്തിയ പരിശോധനയിലാണ് ഗുണനിലവാരമില്ലാത്തതും പഴകിയതുമായ ഭക്ഷണസാധനങ്ങൾ പിടികൂടിയത്. ഇന്ന് രാവിലെയാണ് നെടുമങ്ങാട് നഗരസഭയുടെ ആരോഗ്യ വിഭാഗം പരിശോധന നടത്തിയത്.

 


എൺപത് കിലോയോളം ഇറച്ചിയും മീനും പിടികൂടി. പ്ലാസ്റ്റിക് കവറുകളിൽ പൊതിഞ്ഞ നിലയിലും പാത്രങ്ങളിലും അശാസ്ത്രീയമായി സൂക്ഷിച്ചിരുന്ന ഭക്ഷണസാധനങ്ങൾ കണ്ടെത്തി. വൃത്തിഹീനമായി കണ്ടെത്തിയ ഹോട്ടലുകൾക്ക് പിഴചുമത്തി. പതിനയ്യായിരം മുതൽ ഇരുപത്തി അയ്യായിരം രൂപവരെയുള്ള പിഴയിട്ടുവെന്ന് ആരോഗ്യവിഭാഗം അറിയിച്ചു. ഭക്ഷണത്തിന്റെ ഗുണനിലവാരം, അടുക്കളയിലെ ശുചിത്വം, സുരക്ഷിതമായ സംഭരണം എന്നിവ സംബന്ധിച്ച് കർശന പരിശോധനകളാണ് അധികൃതർ നടത്തിവരുന്നത്.

ഹോട്ടലുകളിൽ ഭക്ഷണം കഴിക്കാനെത്തുന്ന പൊതുജനങ്ങളുടെ ആരോഗ്യസുരക്ഷ ഉറപ്പാക്കാൻ കൃത്യമായ പരിശോധനകളും ശക്തമായ തുടർനടപടികളും ഉണ്ടാകുമെന്ന് നഗരസഭാ ആരോഗ്യ വിഭാഗം അറിയിച്ചു.

വാർത്തകൾ വാട്സ്ആപ്പിൽ ലഭിക്കുവാൻ ക്ലിക്ക് ചെയ്യൂ