കല്ലറ: ഉന്നത വിദ്യാഭ്യാസ വകുപ്പിൻ്റെ കീഴിൽ കല്ലറയിൽ ആരംഭിക്കുന്ന എൻ.സി സി യുടെ ദേശീയ നിലവാരത്തിലുള്ള പരിശീലന കേന്ദ്രത്തിന്റെയും അതിനോടനു ബന്ധിച്ചുള്ള ഹെലിപാഡിൻ്റേയും നിർമ്മാണ ഉദ്ഘാടനം മെയ് 17ന് വൈകുന്നേരം 4 മണിക്ക് കല്ലറ ബസ് സ്റ്റാൻറ് ഗ്രൗണ്ടിൽ ഉന്നത വിദ്യാഭ്യാസ സാമൂഹ്യ നീതി വകുപ്പ് മന്ത്രി ആർ ബിന്ദു ഉദ്ഘാടനം ചെയ്യും. ഇതിൻ്റെ ഭാഗമായുള്ള സ്വാഗത സംഘം അഡ്വ.ഡി.കെ മുരളി എം.എൽ എ ഉദ്ഘാടനം ചെയ്തു. കല്ലറ ഗ്രാമ പഞ്ചായത്ത് പ്രസിഡൻ്റ് ജി.ജെ ലിസിയുടെ അദ്ധ്യക്ഷതയിൽ കൂടിയ യോഗത്തിൽ നെടുമങ്ങാട് ആർ.ഡി ഒ, വി.ജയകുമാർ, എൻ സി സി, റവന്യൂ, പഞ്ചായത്ത് ഉദ്യോഗസ്ഥർ, ജനപ്രതിനിധികൾ, പൊതുപ്രവർത്തകർ തുടങ്ങിയവർ പങ്കെടുത്തു. സർക്കാരിൻ്റെ രണ്ടാം വാർഷികത്തോടനു ബന്ധിച്ചുള്ള നൂറുദിന പരിപാടിയിലുൾപ്പെടുത്തിയാണ് പരിശീലന കേന്ദ്രത്തിൻ്റെ ഉദ്ഘാടനം നിശ്ചയിച്ചിട്ടുള്ളത്.
പരിശീലന കേന്ദ്രത്തിൻ്റെ മാസ്റ്റർ പ്ലാനും കെട്ടിടങ്ങളുടെ രൂപകൽപനയും പൊതുമരാമത്ത് ആർക്കിടെക്റ്റ് വിഭാഗം പൂർത്തിയാക്കിയിട്ടുണ്ട്. കെട്ടിട വിഭാഗമാണ് നിർമ്മാണ പ്രവർത്തനങ്ങൾ നടത്തുന്നത്. പരേഡ് ഗ്രൗണ്ട് ഹെലിപ്പാഡ്, എന്നിവ നിർമ്മിക്കുന്നതിന് രണ്ട് കോടിയുടെ സാങ്കേതികാനുമതി ലഭിച്ചു കഴിഞ്ഞിട്ടുണ്ട്. പൊതുമരാമത്ത് കെട്ടിട വിഭാഗം ടെണ്ടർ നടപടി പൂർത്തീകരിക്കുന്ന മുറയ്ക്ക് നിർമ്മാണ പ്രവർത്തനങ്ങൾ ആരംഭിക്കും. പദ്ധതി നടപ്പിലാക്കുന്നതിന് എല്ലാ സഹായങ്ങളും നൽകാൻ കല്ലറ ഗ്രാമപഞ്ചായത്ത് ഭരണസമിതി തീരുമാനിച്ചിട്ടുണ്ട്. പരേഡ് ഗ്രൗണ്ടിലേക്കുള്ള റോഡ് സൗകര്യം കുടിവെള്ളം, വൈദ്യുതി തുടങ്ങിയവ പഞ്ചായത്ത് ഉറപ്പാക്കുന്നുണ്ട്.
വാമനപുരം എം.എൽ എ അഡ്വ.ഡി.കെ മുരളിയുടെ നേത്രുത്വത്തിൽ സർക്കാരിൽ നടത്തിയ നിരന്തര ഇടപെടലിൻ്റെ ഭാഗമായാണ് ഉന്നത വിദ്യാഭ്യാസ വകുപ്പു മന്ത്രി ഇടപെട്ട് പദ്ധതി ആരംഭിക്കാൻ തീരുമാനമായത്. വാമനപുരം മണ്ഡലത്തിൽ ആരംഭിക്കുന്ന മറ്റൊരു സ്വപ്നപദ്ധതി കൂടി യാഥാർത്ഥ്യമാകുന്നതിലൂടെ വൻ വികസന പുരോഗതി കൈവരിക്കാനും സർക്കാരിൻ്റെ ദുരന്തനിവാരണത്തിനായുള്ള ജില്ലയുടെ ഹബ്ബായി കല്ലറ പഞ്ചായത്ത് മാറുമെന്ന് എംഎൽഎ പറഞ്ഞു.
0 Comments
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, നെടുമങ്ങാട് ഓൺലൈനിന്റേതല്ല.