തീയേറ്ററുകൾ തുറന്നു; പ്രദർശനം നാളെ മുതൽ

കൊവിഡ് ഭീതിയിൽ ഏപ്രിലിൽ താഴിട്ട സംസ്ഥാനത്തെ തീയേറ്ററുകൾ ആറു മാസത്തിന് ശേഷം ഇന്ന് വീണ്ടും തുറന്നു. എങ്കിലും സിനിമാ പ്രദർശനം ബുധനാഴ്ച മുതലായിരിക്കും ആരംഭിക്കുന്നത്. പ്രൊജക്ടറുകൾ പ്രവർത്തന സജ്ജമാണെന്ന് വിലയിരുത്തുകയും സംവിധാനങ്ങൾ ക്രമീകരിക്കുകയും സാനിറ്റൈസേഷനും മറ്റുമൊക്കെയാകും രണ്ട് ദിവസം നടക്കുന്നത്. വെള്ളിയാഴ്ചയാണ് മലയാളത്തിൽ ആദ്യ സിനിമയുടെ റിലീസ്. ഇന്ന് മുതൽ ബുക്ക് മൈ ഷോയിൽ ഉൾപ്പെടെ ബുക്കിംഗ് ആരംഭിച്ചിട്ടുണ്ട്.

ജയിംസ് ബോണ്ട് ചിത്രം ‘നോ ടൈം ടു ഡൈ ’, ‘വെനം 2’, ഷാംഗ് ചി, ‘ഡോക്ടർ തുടങ്ങിയ സിനിമകളാണ് 27, 28 തീയേതികളിൽ തീയേറ്ററുകളിൽ പ്രദർശിപ്പിക്കുന്നത്. കേരളത്തിന് പുറത്ത് മുന്നേ തീയേറ്ററുകൾ തുറന്നതോടെ വന്ന ചിത്രങ്ങളാണിവ. ജോജു ജോർജ് ചിത്രം ‘ സ്റ്റാർ’, അപ്പാനി ശരത് നായകനാകുന്ന ‘മിഷൻ സി’, ക്യാബിൻ എന്നീ സിനിമകൾ 29ന് റിലീസാകും. രജനീകാന്ത് ചിത്രം അടക്കം തമിഴ്–ഹിന്ദി ദീപാവലി റിലീസുകൾ നവംബ‍ർ ആദ്യവാരമെത്തുമെന്നാണ് കണക്കുകൂട്ടുന്നത്. ദുൽഖർ സൽമാൻ ചിത്രം കുറുപ്പ്, സുരേഷ് ഗോപി ചിത്രം ‘കാവൽ’ തുടങ്ങി വലിയ റിലീസുകൾ അതിന് ശേഷമുണ്ട്.

പകുതി സീറ്റുകളിൽ മാത്രമാണ് ഇപ്പോൾ പ്രവേശനം അനുവദിച്ചിട്ടുള്ളത്. രണ്ട് ഡോസ് വാക്സീൻ എടുത്തവർക്കാണ് പ്രവേശനം. മറ്റ് സംസ്ഥാനങ്ങളിലുള്ളതുപോലെ ഒറ്റ ഡോസ് വാക്സീൻ എടുത്തവരെയും തീയേറ്ററുകളിൽ അനുവദിക്കണമെന്നും 100 ശതമാനം പ്രവേശനത്തിന് അനുമതി നൽകണമെന്നും തീയേറ്റർ സംഘടനകളും സിനിമാ സംഘടനകളും സർക്കാരിനോട് ആവശ്യപ്പെട്ടിട്ടുമുണ്ട്.