പോത്തൻകോടിനു സമീപം പുലിയെ കണ്ടതായി നാട്ടുകാർ

പോത്തൻകോട്: പോത്തൻകോടിനു സമീപം കാവുവിളയിൽ പുലിയെ കണ്ടതായി നാട്ടുകാർ. കഴിഞ്ഞ ദിവസം രാത്രി പന്ത്രണ്ടരയോടെ പുലിയെ കണ്ടതായി പറയപ്പെടുന്നത്.

കാവുവിള പുതുവൽ പുത്തൻ വീട്ടിൽ ജിതിനാണ് പുലിയെ കണ്ടതായി പറയപ്പെടുന്നത്. ജിതിൻ രാത്രി പന്ത്രണ്ടരയോടെ വീട്ടിനു മുന്നിലിരിക്കുമ്പോഴാണ് റോഡിലൂടെ നടന്നു പോയ പുലിയെ തെരുവു വിളക്കിന്റെ വെളിച്ചത്തിൽ കണ്ടതായി പറയുന്നത്. ആളനക്കം കേട്ട പുലി തൊട്ടടുത്ത മതിൽ ചാടിപ്പോയതായും ജിതിൻ പറയുന്നു.

ഇന്നു രാവിലെ തൊട്ടടുത്തുള്ള പ്രഭുല്ലന്റെ വീട്ടിനു മുന്നിൽ പുലിയുടേതെന്നു കരുതുന്ന കാൽപ്പാടുകളും കണ്ടെത്തിയിട്ടുണ്ട്. വനംവകുപ്പുദ്യോഗസ്ഥരെയും പോലീസിനെയും വിവരമറിയിച്ചെങ്കിലും ഇവിടെ കണ്ടെത്തിയ കാല്പാടുകൾ പട്ടിയുടേതോ വള്ളിപ്പൂച്ചയുടെതോ ആകാമെന്നാണ് ഉദ്യോഗസ്ഥർ പറയുന്നത്. പുലിയെ കണ്ടെന്നു പറയുന്ന സ്ഥലം വനമേഖലയോട് അടുത്തല്ലാത്തതിനാലും വളർത്ത് മൃഗങ്ങളെ ആക്രമിക്കാത്തതും പുലിയാകാനുള്ള സാധ്യതയല്ലാ എന്നും ഉദ്യോഗസ്ഥർ പറയുന്നു.