തിരുവനന്തപുരം ജില്ലയിൽ കൊവിഡ് ടെസ്റ്റ് പോസിറ്റിവിറ്റി റേറ്റിൽ കുറവ് രേഖപ്പെടുത്തി

തിരുവനന്തപുരം: സംസ്ഥാനത്ത് കൊവിഡ് ടെസ്റ്റ് പോസിറ്റിവിറ്റി നിരക്ക് ഉയരുന്നതിനിടെ ജില്ലയിലെ കൊവിഡ് ടെസ്റ്റ് പോസിറ്റിവിറ്റി റേറ്റിൽ (ടി.പി.ആർ) കുറവ് രേഖപ്പെടുത്തി. ജനുവരിയിൽ 11 ശതമാനം ആയിരുന്ന ടി.പി.ആർ മാർച്ച് അവസാനത്തോടെ 3.9 ശതമാനം ആയാണ് കുറഞ്ഞത്. കഴിഞ്ഞ വർഷം സെപ്തംബറിൽ ആന്റിജൻ പരിശോധനകൾ അടിസ്ഥാനമാക്കിയുള്ള ടി.പി.ആർ 23.9 ശതമാനം ആയിരുന്നു. ഡിസംബറിൽ ഇത് 10 ശതമാനമായി കുറഞ്ഞു.

ജനുവരി ആയപ്പോഴേക്കും നിരക്ക് വീണ്ടും ഉയരുകയായിരുന്നു. ജനുവരി അവസാന ആഴ്ച ആയപ്പോഴേക്കും നിരക്ക് 11.5 ശതമാനത്തിലേക്ക് എത്തി. ഫെബ്രുവരി ആദ്യ ആഴ്ച ആയപ്പോഴേക്കും ടി.പി.ആർ 9.8 ശതമാനവും നാലാം ആഴ്ചയിൽ 5.6 ശതമാനത്തിലേക്കും താഴ്ന്നു. മാർച്ചിൽ ടി.പി.ആർ അഞ്ച് ശതമാനത്തിന് താഴെ എത്തുകയും ചെയ്തു.ജില്ലയിൽ ഏറ്റവും കുറഞ്ഞ ടി.പി.ആർ രേഖപ്പെടുത്തിയത് മാർച്ച് മൂന്നിനായിരുന്നു, 2.5 ശതമാനം.