അടച്ചുപൂട്ടിയ ജില്ലാ ആശുപത്രി കന്റീൻ ബലമായി തുറന്നു പ്രവർത്തിക്കാനുള്ള ശ്രമത്തിനെതിരെ കോൺഗ്രസ് കമ്മിറ്റിയുടെ പ്രതിഷേധം

നെടുമങ്ങാട്: ജില്ലാ ആശുപത്രിയിൽ ആരോഗ്യവിഭാഗത്തിന്റെ പരിശോധനയെ തുടർന്ന് അടച്ചുപൂട്ടിയ കന്റീൻ ചില രാഷട്രീയക്കാരുടെ ഒത്താശയോടുകൂടി കഴിഞ്ഞ ദിവസം ബലമായി തുറന്നുകയറി പ്രവർത്തിക്കാൻ നടത്തിയ ശ്രമത്തിൽ മണ്ഡലം കോൺഗ്രസ് പ്രസിഡന്റ് ടി.അർജുനൻ ശക്തമായി പ്രതിഷേധിച്ചു. നഗരസഭയിലെ ആരോഗ്യവിഭാഗം അനവധി തവണ റെയ്ഡ് നടത്തി മോശമായ ആഹാരപദാർഥങ്ങൾ ഈ കന്റീനിൽ നിന്നു പിടിച്ചെടുക്കുകയും താക്കീതുകൾ നൽകുകയു ചെയ്തിട്ടും ഫലമില്ലാതെവന്നതോടെയാണ് ആശുപത്രി എച്ച്എംസി കമ്മിറ്റി ഇടപെട്ടു കന്റീൻ അടച്ചുപൂട്ടിപ്പിച്ചത്. തുടർന്നു ടെൻഡർ വിളിച്ചു പുതിയ നടത്തിപ്പുകാരെ കണ്ടെത്തിക്കൊടുക്കുവാനും തീരുമാനിച്ചിരുന്നു. അതിനെ അട്ടിമറിക്കാൻ ശ്രമിക്കുന്ന തരത്തിലാണു ബലാൽക്കാരമായി കന്റീൻ തുറന്നുപ്രവർത്തിക്കാൻ ശ്രമം നടന്നതെന്നും ഇതിനെതിരെ ശക്തമായ പ്രതിഷേധം സംഘടിപ്പിക്കുമെന്നും അർജുനൻ അറിയിച്ചു.