എറണാകുളം: കെഎസ്ആര്ടിസി ബസുകളില് പരസ്യങ്ങള് പാടില്ലെന്ന് ഹൈക്കോടതി. കെഎസ്ആര്ടിസി, കെയുആര്ടിസി ബസ്സുകളിലെ പരസ്യങ്ങള് സുരക്ഷാ മാനദണ്ഡങ്ങള്ക്ക് വിരുദ്ധമാണെന്നും സുരക്ഷാ മാനദണ്ഡം പാലിക്കുന്നതില് സ്വകാര്യ പൊതു വാഹനങ്ങള് എന്ന വ്യത്യാസമില്ലെന്നും കോടതി കൂട്ടിച്ചേര്ത്തു. വടക്കഞ്ചേരി ബസ് അപകടത്തെ തുടര്ന്ന് സ്വമേധയാ എടുത്ത കേസിലാണ് കെഎസ്ആര്ടിസി ബസ്സുകളിലെ പരസ്യങ്ങള് സുരക്ഷാ മാനദണ്ഡങ്ങള്ക്ക് വിരുദ്ധമാണെന്ന് ഹൈക്കോടതി നിരീക്ഷിച്ചത്. സുരക്ഷാ മാനദണ്ഡം പാലിക്കുന്നതില് കെഎസ്ആര്ടിസി ബസ് എന്നോ സ്വകാര്യ ബസ് എന്നോ വ്യത്യാസമില്ല. സുരക്ഷാ മാനദണ്ഡം പാലിക്കുന്നതില് ആര്ക്കും പ്രത്യേക ഇളവുകള് ഒന്നും ഇല്ല. സുരക്ഷാ മാനദണ്ഡങ്ങള് എല്ലാവരും ഒരുപോലെ പാലിക്കണമെന്നും കോടതി നിര്ദേശിച്ചു.
സ്വകാര്യ ബസ്സുകളില് അടക്കം ഡ്രൈവര് കാബിന്, യാത്രക്കാര് ഇരിക്കുന്ന സ്ഥലം എന്നിവിടങ്ങളില് പരസ്യങ്ങളോ നിരോധിത ഫ്ലാഷ് ലൈറ്റുകളോ പാടില്ല. വിദ്യാഭ്യാസ സ്ഥാപനങ്ങളിലെ എക്സ്പോകള്, ഓട്ടോ ഷോ എന്നിവയില് രൂപമാറ്റം വരുത്തിയ വാഹനങ്ങള് ഉപയോഗിക്കരുതെന്നും ഹൈക്കോടതി നിര്ദേശിച്ചു. ട്രാന്സ്പോര്ട്ട് കമ്മീഷണര് ഇക്കാര്യം ഉറപ്പുവരുത്തണമെന്നും കോടതി നിര്ദ്ദേശം നല്കി. വടക്കഞ്ചേരി ബസ് അപകടത്തില് സ്കൂള് അധികൃതരുടെ ഭാഗത്ത് നിന്നും വീഴ്ച സംഭവിച്ചുവെന്ന് ഹൈക്കോടതി നിരീക്ഷിച്ചു. സുരക്ഷാ മാനദണ്ഡങ്ങള് പാലിക്കാത്ത വാഹനം വിനോദ യാത്രയ്ക്കായി ഉപയോഗിച്ചത് സ്കൂള് അധികൃതരുടെ വീഴ്ചയാണെന്നും കോടതി പറഞ്ഞു.
0 Comments
വാര്ത്തകളോടു പ്രതികരിക്കുന്നവര് അശ്ലീലവും അസഭ്യവും നിയമവിരുദ്ധവും അപകീര്ത്തികരവും സ്പര്ധ വളര്ത്തുന്നതുമായ പരാമര്ശങ്ങള് ഒഴിവാക്കുക. വ്യക്തിപരമായ അധിക്ഷേപങ്ങള് പാടില്ല. ഇത്തരം അഭിപ്രായങ്ങള് സൈബര് നിയമപ്രകാരം ശിക്ഷാര്ഹമാണ്. വായനക്കാരുടെ അഭിപ്രായങ്ങള് വായനക്കാരുടേതു മാത്രമാണ്, നെടുമങ്ങാട് ഓൺലൈനിന്റേതല്ല.